【沪语悦读】陕南村搭仔克莱门公寓（​作者：薛理勇 沪语改写、讲述：边秦翌 文字修正：丁迪蒙）

（下）

点击下方收听音频，时长09分28秒。

勒上篇里向，已经讲到亚尔培公寓是“普爱堂”个产业，大约摸1930年建成，是赖安工程师行个建筑师列文设计个。占地25亩，有16幢独立个四层楼砖木石混合结构房子，另外还有37幢二层楼房子，总建筑面积23147平方米。16幢独立公寓式样邪气别致，搭其他公寓有得明显个差别。每幢房子个平面差勿多侪是长方形个，门头搭仔楼梯间往外头凸出去，屋顶是多坡红瓦，外立面用清水红砖搭仔黄颜色拉毛水泥构成个线条搭仔图案，色彩对比邪气强烈，显得特别有气派。进门地方有只门厅，一梯二户，每户各三室，建筑面积大约摸100平方米。

最早个租客名单里有，英商威大洋行，颐中烟公司，望赉水火保险公司，还有远东进出口公司咾啥，一般来讲，亚尔培公寓由公司或者洋行出面，拿房子长期租赁下来，再拨自家个高级职员来居住。从租客个身份搭仔建筑档次来看，规模比较大，又勒市中心，应该是只中高档个住宅区。

勒勒沪西，还有只住宅区搭亚尔培公寓“长得邪气像”，也是“普爱堂”产业，搿就是今朝复兴中路1363弄个“克莱门公寓”。

勒上海市城市建设档案馆里还好寻到克莱门公寓个原始图纸，建筑设计单位是大名鼎鼎个美商克明洋行，邬达克先头就勒搿家洋行工作个；图纸签发个辰光是“1919年10月21号”，按照出图辰光，可以大约摸推断出克莱门公寓动工辰光。现在有眼专家拿克莱门公寓个建设辰光定为“1928年”，好像勿大准确，可以再探讨一下，“有图有真相”嘛。

克莱门，英文意思是温和、慈祥，勿晓得“克莱门公寓”是否就是“祥和公寓”个意思。我老里八早读过一篇介绍克莱门公寓个文章，讲“克莱门”是个船长，有钞票之后定居上海，开了家房地产公司，投资建设了交关房子，克莱门公寓是其中之一。搿歇想想，一定又是个新编出来个“冒险家个故事”。

邪气有趣个是，我寻到一份20世纪30年代克莱门公寓个住户登记表，里向有两个人叫“克莱门”，两个人侪是克莱门公寓个管理员。可能是兄弟道里，或者是“普爱堂”个教友。葛末，克莱门公寓，迭个名字到底有啥故事呢，大家侪讲勿清爽了。会勿会直接用管理员个名字来命名呢？倒也勿晓得，必过，我有迭个猜想个。

克莱门公寓搭仔亚尔培公寓建设年代邪气近，长得也邪气像，只必过规模小一眼，占地面积只有5600多平方米，大门朝北，开勒现在个复兴中路1363号搿搭，一塌刮子只有5幢4-5层个砖木石混合结构洋房，底层个外立面用清水红砖，二层以上侪是拉毛水泥外墙，窗框搭仔墙隅用红砖勾出了错落有致个线条，颜色对比邪气强烈，立体效果特别好；每幢洋房占地面积大约摸400平方米，每层再分割成1-4套大小勿一样个套间，满足勿同个需求；另外，还有廿多间汽车间对外租赁。

1937年个辰光，克莱门公寓有得40家人家，平均每幢8家，也就是讲，每个楼面只有2家，搿能介算下来，每家人家个建筑面积勒200平方米左右，比亚尔培个100平方米足足大了一倍。我还查到了克莱门公寓个部分房客，有德商德孚洋行个部门负责人，德商禅臣洋行个部门经理，丹麦慎昌洋行部门负责人，英商上海电力公司高级工程师，美商中和灯泡公司总经理咾啥。高头讲到个公司或者洋行，伊个辰光侪是邪气有名个外资商事机构，应该讲，档次要比亚尔培公寓高得忒多了。

1996年之后，我担任过勿少媒体个顾问，参与了好几部关于上海建筑个电视纪录片个摄制，也号几次到克莱门公寓里去，角角落落侪去仔细看过。里向个住户侪搭我讲，老底子此地是外国人个总会，是伊拉吃吃白相相、钞票勿当钞票个地方。根据我个经验，只要是相同个信息，绝大多数情况也是同一只信息来源，葛么也就听过去算了。

《XXX地名志》（1998年版）里向讲：克莱门公寓“是一家旅馆式公寓。主要是供少数外国人吃喝玩乐个场所，里向设有咖啡厅、跳舞厅、游泳池搭仔一爿内森饭店。也有少数个中国富商豪绅搬入居住。”看来，搿歇住勒克莱门公寓里向个住户老有可能受埃本地名志影响，再会有得相同个讲法；也有可能是迭本地名志勒编个辰光，受住户个影响，再写了搿种搞勿清爽个文字。实际浪，调只角度想想，克莱门公寓是天主教“普爱堂”投资建设个高档公寓住宅，按照教规，也勿会得“胡天野地”伐？此地进出个侪是上海滩浪有头有脸个富人，伊拉绝对勿允许自家个住宅区变成只影响自家档次个“下只角”伐？

1941年，太平洋战争爆发之后，克莱门公寓并呒没受到忒大个影响，到后首来，英美等国个侨民开始撤离回国了，公寓个房客大量流失，租金收入就勿好了呀。1949年之后，克莱门公寓由上海房地产部门接管，总体保存还算蛮好，现在已经拨公布为上海优秀历史建筑，要好好叫保护起来了。

最近，，电影院里刚好勒放《西虹市首富》，里向有“假使侬有10亿钞票，哪能用脱伊”，来让人思考中年危机，也顺带便证明了钞票对“档次”个杠杆作用。勿管哪能讲，到今朝，亚尔培照样保持伊个“档次”，克莱门照样保持“克勒”。大家讲是伐？